چوارشەممە 27-12-2023 بە ئامادەبوونی سەرۆک و جێگری سەرۆک و سکرتێر و ئەندامانی یەکێتی تۆپی پێی کوردستان کۆبوونەوەی ئاسایی خۆی ئەنجامدا و تیایدا ئەم بڕیارو راسپاردانەی خوارەوەی دەرکرد .

1_ یەکێتی تۆپی پێی کوردستان سوپاسی هاندەران و سەرجەم وەرزشوانانی دەڤەری ڕاپەڕین دەکات تایبەت هاندەرانی یانەی چوارقوڕنە  کە لە یاری نێوان هەر دوو یانەی چوارقوڕنە و ڕانیە توانیان سیمایەکی جوانی وەرزشی و سەردەمیانە پێشکەش بکەن و بە شێوەیەکی شارستانی پاڵپشتی و هانی  یانەکانی خۆیان بدەن بێ هیچ کێشەیەک، هیوادارین هاندەرانی یانەکانی کوردستان هەمووکات بەمشێوەیە ببینرێن لە یاریگاکاندا، هەروەها سوپاسی تایبەتی  پیاوانی پۆلیس و پارێزەرانی یاریگادەکەین بۆ دابینکردنی کەشێکی وەرزشیانە و ڕاپەڕاندنی کارەکانیان بەوپەڕی دڵسۆزیەوە، ماندوبونیان جێگای ڕێزە،  لە هەمان کاتدا ڕۆڵی بەڕێز عەبدوڵا عومەر هەماهەنگکاری وەرزشی لە دەڤەری ڕاپەڕین بەرز دەنرخێنین کەوا کاریگەری تەواوی دروستکردووە لە سەر جەماوەری وەرزشی و هەمیشە هاوکارێکی باش بووە بۆ پیشاندانی ڕووی جوانی وەرزش لەم دەڤەرە.

2_ تیروپشکی خولی یانە پلە دووەکانی کوردستان لە ڕۆژی 10-1-2024  چوارشەممە کاتژمێر 1:30 دوای نیوەڕۆ لە بارەگای یەکێتی تۆپی پێی کوردستان ئەنجامدەدرێت، بۆ هەر یانەیەکی بەشدار بوو یەک نوێنەریان ئامادەبێت لە کاتی دیاریکراودا. 

3_ سکاڵای یانەی جیهان لە پاڵەوانیەتی فێرگەکانی یانەکانی کوردستان دژی یانەی بروسک ڕەتکرایەوە. 

4_ بەڕێز هێمن مەحمود ناوبژیوان لەخولەکانی کوردستان پێویستە لە کۆبوونەوەی داهاتووی یەکێتیەکەمان ئامادەبێت. 

5_ بە هۆی فڕێدانی یاری ئاگرین بۆ نێو یاریگا لە یاری نێوان یانەی دەربەندیخان و یانەی سۆران بڕیاردرا بە : 

آ _ پێبژاردنی یانەی دەربەندیخان بە بڕی (150000) سەت و پەنجا هەزار دینار. 

ب_ ئاگادار کردنەوەی یانەی دەربەندیخان بە کۆنتڕۆڵکردنی هاندەرانی و بە پێچەوانەوە تووشی سزای توند دەبن. 

6_ بە هۆی وەرگرتنی کارتی سوور  لە یاری نێوان یانەی ڕانیە و یانەی شێروانە، بڕیاردرا بە پێبژاردنی سەرپەرشتیاری یانەی ڕانیە خدر ڕەسوڵ بەبڕی 250000 دووسەت و پەنجا هەزار دینار.

7_ بە هۆی هاتنە نێو یاریگا و وەرگرتنی لێدوان و ڕووماڵکردنی پێش دەسپێکی یاری نێوان یانەی چوارقوڕنە و یانەی ڕانیە کە ئەمە پێچەوانەی ڕێنماییەکانی یەکێتی تۆپی پێی کوردستانە، یەکێتیەکەمان سکاڵا لە دژی کەناڵی سپێدە تۆمار دەکات لە دادگا، چونکە کەناڵی ناوبراو مافی ڕووماڵکردنی یارییەکانی خولی نایابی کوردستانی وەرنەگرتووە.