ڕۆژی دووشەممە، 19ـی تشرینی یەکەمی 2026، لە شاری هەولێر، شاندێکی باڵای یەکێتی تۆپی پێی کوردستان بە سەرۆکایەتیی کاپتن سەلاحەدین سیامەند، سەرۆکی یەکێتی تۆپی پێی کوردستان، و بە ئامادەبوونی جێگری سەرۆک، سکرتێر و سەرجەم ئەندامانی یەکێتی تۆپی پێی کوردستان، لەلایەن د. ئومێد سەباح، سەرۆکی دیوانی ئەنجومەنی وەزیرانەوە پێشوازیمان لێکرا.

لە کۆبوونەوەیەکی ئاستبەرزدا، گفتوگۆیەکی ورد و هەمەلایەنە لەبارەی ڕەوشی گشتیی وەرزش بە گشتی و یاریی تۆپی پێ بە تایبەتی لە هەرێمی کوردستان بەڕێوەچوو. لە تەوەرێکی سەرەکیدا، شاندی یەکێتی تۆپی پێی کوردستان هەڵوەستەی لەسەر ئاستەنگ و کێشە و گرفتەکانی ئێستای بەردەم کارەکانی کرد، بە مەبەستی دۆزینەوەی ڕێگەچارەی گونجاو و دابینکردنی پشتیوانیی پێویست بۆ سەرکەوتنی پڕۆسەکە.

هاوكات، بڕگە و هەنگاوە کردارییەکان بۆ دەستپێکردنەوە و بەڕێوەچوونی خولە جیاوازەکانی هەرێمی کوردستان بۆ وەرزی نوێ خرانەڕوو، و جەخت لە خولقاندنی کەشێکی لەبار و شایستە بۆ یانەکان و وەرزشکاران کرایەوە.

لای خۆیەوە، د. ئومێد سەباح، سەرۆکی دیوانی ئەنجومەنی وەزیران بە بڕوایەکی قووڵ و بە گرنگییەوە لە ڕۆڵ، پێگە و بایەخی یەکێتی تۆپی پێی کوردستان و ئاستی گەشەسەندنی وەرزشی لە هەرێم ڕوانی. هەروەها جەختی لەسەر بەردەوامبوون و بایەخدانی زیاتر بۆ بەرەوپێشبردنی ژێرخانی سێکتەری وەرزش و یاریی تۆپی پێ لە هەرێمی کوردستان کردەوە، و ئامادەیی خۆی بۆ ئاسانکاری و پشتیوانیکردنی گەشەی وەرزش دەربڕی.